فِضْيَت السَّاحَه، سُكوت
قاعدين في البُيوت
مْسَكْرين هَالأَوادِم
المَتاجِر وِالمَطاعِم
النَّوادي والمَدارِس
وِالجَّوامِع وِالكنايِس
ما حَدا بِطلَع بِفوت
قاعدين في البُيوت!!
***
طْفالْنا من غير مَلاعِب
وْلادْنا من غير مَكاسِب
لا قَهاوي لا مَكاتِب
لا مُحامي لا مُحاسِب
فَلَّت حَتَّى الجَّنادِب
ناس هيكي عَمْ تراقِب
مِشْ عارفِه مين تِعـــــاتِب
وَلا صاحِب يِلْقى
صاحِب، ...
حالِةْ قْعود وْسُكوت...
ناطْرين في البُيوت!!
***
فيروس صاب البَشَر
خَوَّف الطِّير وِالشَّجر
عَتَّم النِّجْمِه ... القَمَر
وَقَّف السِّــير والسَّــفَر
خَرَّب بُيوت العَنكَبوت
بُكرَه مَدْري مين يِموت
يِمشي وحدو بِالتَّابوت
ناطْريـن في البُيوت!!