غالي ع قلبي يا بلد
عايش على حُبِك مَدّد
يشهَد عليّ القوم
ما خُنت عَهّدِك يوم
ع الوَّعد باقي دوّم
غَنيّ باسمِك للأبد

تاريّخِك اللي كان
بالبال باقي مُعتَمد
مَحفور بالصوّان
أمجاد ما الّها عَدد
ع العّز والأخلاق
رَبينا الوَلد
بالأمل عايشين
سنين بعد سنين
شفاعمرو ما بتلين
لو ما انجلى عنها الزَبد

للأرض يوم
بيشهدوا فيو الحجار
اضراب
مش اضراب
شو هوي القرار
زَيَّاد* فوق الطَاوله
وحَوله أكم مُختار
عارضوا الاضراب
قالوا عنو انتِحار
وتجمعوا شِلّة شَباب صّغار
ولّعوها نار
زنود، وضَرب حجار
هني لوحدهن بلشوا المشوار
ع دَربهن تّكاثفوا الأحرار
بشاغورنا المِغّوّار
الشَاب والخِتيار
وحرمه ع باب الدار
بوّجه العِدا إعّصار
من وقتها التاريخ
بكتابه شَهَد

قال طيب الذكر المربي إبراهيم بحوث:
"شفاعمرو ويكفي إنها بلدي لأهواها"

وأقول:
من بعد منو حَدا ما عاد سَوّاها
لو يحفَظوا الكبار شي يوم معناها
واستاذنا بالدَرس لو كان غَناها
ما كان في أحقاد عم تِهدم أعاليّها
ولا كان في قَواد للفِتن يرميها
وع طول كان الوِفق ع الرِزق عَاطّيها
بيتعمر البُنيان والأهل والجيران
والشِيب والشُبان لمَجّدها العَالي سَند

مَره صلاح الدين لّمن مَرق فيها
فُسطاط ع اسمُه بالاسم غانيها
من قَبل منو عُمر بالمي شافيها
جَاب اسمُه وعطّاها باسمُه مسميها

يعقوب بن زبده واحد من ولادك
تلميذ أبن الرب بشفاعتُه زادك
بكنيستُه لوّقا مَزروع بترابك
امجاد للتاريخ محفوره ع بوابك

محَمد اليوسف شيخ من الجبل اثقل
يوم الوغى والحَرب، ما كان يتمَهل
شَد العزيمه وقَصد ع هوشه يتسلّل
رصاص العِدى والنَار يا مين يتّحَمل
راجع ع بيتُه وكان بالكَفن يتسَربَل
وسجلوا التاريخ شَهيّدك الأول

من عِزوّتِك في رجّال الّهُن تاريخ ومَجّد
والزَمَن لما مّال، غيّر الأحّوال، مين اللي يوضّع له حد
عمّال ع بطّال، دجّال ع محتّال، وضعّوا عليكي اليَد
من يوّمت اللي قال ما تعَدل العِدال
لو كان فيكي رجّال وقفت بوجّهُن سَد

بثورة العُمال، بالواحَد وستين
كَذّب النَذِل لو قال، شُبّان جَهّلاّنين
عِزّوة والّها رجّال، بيباطحّوا السِكين
واجَهّوا ارتَال لجيوّش محتَليّن
ع المَرجَلهّ يا جبال من أرضك فلسطين
صَدق المَثَل لو قال، لو تِعرفّوا تَخّمين
قتلوا فَقير الحَال، وشتتوا الباقين
تزعّمُوا الانذال، وحكموا على المرتَد

يا حضرة المسؤول
صار العدل مخبول
في حدا عم بتقول
ضربوا العرض بالطول
في ناس دقوا طبول
وسمعوا حكي معسول
ع الوعد يا فضول
ماشي ع درب الغول
طول الوقت مشغول
تتعدل المسطول
وان قلت مش معقول
بكرا بجيك الرد

شفاعمرو تشرين اول 2013

موقع العرب يفسح المجال امام الكتاب لطرح أفكارهم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية رأي حر.
لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net